Ei oppgradering på Android Wear fronten - 2. generasjons Moto 360

Som de som har lest det eg har skrive på denne bloggen før veit, så har eg hatt ei Android Wear-klokke omtrent sidan dei fyrst kom i butikkane for snart halvanna år sidan.
Då eg budde i Australia gjekk eg nemleg til innkjøp av den originale LG G Watch då den kom ut der nede, og den har vore flittig brukt opp til for eit par månader sidan, då lademekanismen ikkje lenger var påliteleg nok til dagleg bruk.

Den klokka eg originalt hadde tenkt til å kjøpe var Moto 360, den fyrste runde og då den klart finaste av smartklokkene som hadde vorte vist fram. Då den kom ut var det dog ein del ting eg og andre reagerte på, som dårleg batteritid og at den til tider reagerte treigt, mykje fordi Motorola hadde valgt å gå for ein gamal Texas Instuments-prosessor. Det vart difor ikkje noko Moto 360 på meg den gongen, sjølv om eg heldt auge med den i lange tider.

På hausten i fjor var difor gleda stor då Motorola viste fram den nye Moto 360. Riktig nok var den ikkje noko særleg til oppgradering frå dei andre klokkene på marknaden, bortsett frå at den var ein av få som var runde (og at den i min meining deler plassen om flottast design saman med Huawei Watch).

Etter å ha gått litt fram og tilbake med meg sjølv om det var naudsynt gjekk eg difor førre veke til innkjøp av ei ny 46mm  2. generasjons Moto 360.
Klokka vart bestilt hos Komplett, og dukka opp i "posten" hos meg 2 dagar seinare.
Etter å ha skudd den på, kopla til mobil, lada og oppdatert klokka var den endeleg klar til bruk.

Fyrsteinntrykket var veldig bra. Designet er nydeleg, og den ser meir eller mindre ut som ei vanleg analog klokke, med flott klokkehus i børsta stål (no med feste til reim stikkande ut på kvar side), blank kant rundt skjermen og flott reim i brunt skinn. Fleire andre har og nevt at dei trudde det var ei vanleg klokke heilt til dei oppdaga at eg "fingra med den som ein skjerm".

Når det kjem til bruk har det vore litt hikke no og då. Det fyrste eg reagerte på var at den allereie frå dag ein hadde problem med å innstallere Google Fit (som eg har valgt å bruke til skritteljing og pulsmåling). Etter restarting av både klokke og mobil og resynkronisering av appar kom den seg dog på plass til slutt og eg har ikkje hatt noko problem med den sidan.

I generell bruk har det ikkje vore noko slags problem med klokka, bortsett frå at eg av og til har måtta gå inn i Wear appen på telefonen for å kople den til på nytt (ikkje registrere) eller for app synkronisering. Den er rask og responsiv og gjer det den skal.

Batteriet klarer seg fint over ein heil dag. Eg har tatt den av ladaren kvar dag klokka seks om morgonen, og hatt den kopla til telefon og i bruk heile dagen med automatisk lysstyrke og skjermen alltid på, og har likevel hatt over 30% igjen på batteriet når eg legg meg om kvelden.
Ladaren er og veldig grei, då den kun er ein liten "stol" ein legg klokka på, og så lader klokka induktivt. Medan klokka står på lading kan ein og velgje å ha klokkeslett og batteriprosent visande på skjermen, noko eg personeleg liker veldig godt.

Sidan eg sist skreiv om Android Wear har det endra seg mykje, og det er fleire nye endringar  på veg (som t.d. støtte for høgtalar, noko denne klokka ikkje har). Men desse vil eg ikkje gå inn på her. Kanskje ein annan gong?

Alt i  alt er eg med andre ord veldig nøgd med klokka. Eg gler meg til å bruke den vidare, og til å sjå kva nytt som kjem til Android Wear, sjølv utan støtte for alt saman.

Tredje generasjon smartklokker er jo heller ikkje så langt vekke. Så det er nok mykje nytt å sjå fram til det kommande året.

Mine fyrste dagar med Android Wear

Sist fredag gjekk eg til innkjøp av ei Android Wear klokke av typen LG G Watch. Den er svart, relativt rektangulær med avrunda kantar og har grått gummiband. Mange har "klaga" på dette designet, og har sett den (og evt. Samsung Gear Live) til side for å vente på den svært mykje meir klokkete og "high-end-design" Moto360. Eg sjølv hadde og tenkt til det, men etter planen tenkte eg at dersom det var mogeleg at eg skulle ha to. Ei Moto360 til "finare" lag, dvs. til vanlege klede og finare klede, og ei LG til trening og liknande.
No har eg då gått til anskaffelse av sistnemnde, sjølv om planen eigentleg var å gjere det motsett veg. Og her er mitt inntrykk etter 4 dagar med den.

Klokka i seg sjølv liker eg særs godt. Den ser riktig nok ikkje ut som ei klokke, men det føler eg heller ikkje er naudsynt med eit slikt produkt. For min del er det heilt greit at det er mogeleg å sjå at det ikkje er ei vanleg klokke eg har på armen. Dette er ei smartklokke med ein LCD-skjerm, då er det heilt greit for meg at den og ser ut som det. Eg kan forstå at ein del ikkje ser på det på same vis, og ynskjer noko litt meir subtilt, og det er eg og delvis einig i, spesielt dersom ein skal bruke den saman med "finare" klede.

Mange har og klaga på bandet som føl med, personleg likar eg det og svært godt. Det er ein kul matt gråfarge, og materialet er svært mjukt. Fordelen her er jo og at den bruker vanleg klokke metode for å feste band, så her kan det bytast ut alt ein orker utan å måtte støtte seg til det klokkeprodusenten kjem med.

I bruk har den ført til at eg tek opp telefonen mykje skjeldnare enn det eg gjorde før. Spesielt med tanke på varsel frå telefon og for å sjekke kva klokka er. Å få vibrasjonsalarmar på armen når det er noko, anten det er varsel frå appar, faktiske alarmar eller tidtaking er veldig mykje meir behagelig enn hylande telefonar. Eg slepp å ta opp telefonen for å sjekke notat som t.d. handleliste, noko eg likar særs godt t.d. på butikken. Spesielt saman med trilling av handlevogn så er det greit å sleppe å ha telefonen i handa. Det einaste eg har å klage på der er at eg synest klokka kunne haldt seg "vaken" når ein var inne på eit Google Keep notat over lengre tid, noko andre appar som t.d. allthecooks gjer. Men det er vel meir ein klage mot Keep og ikkje sjølve klokka. Det kan og henda at Evernote (som er den andre notat-appen som har Wear-støtte) gjer dette, men det har eg ikkje prøvd.

Ein annan ting mange har tenkt på er korleis den oppfører seg i direkte dagslys. Sjølv bruker eg den med skjermen alltid på og omlag 50% lysstyrke, dvs. at det alltid står noko på skjermen, men når den ikkje er i bruk er det kvit skrift på svart bakgrunn. Slik som det er det ganske vanskeleg å sjå kva som står på klokka i direkte sollys. Men i vaken tilstand har ikkje eg hatt noko problem med å sjå kva som står.

I natt testa eg den saman med Sleep as Android, noko som såg ut til å virke fint. Klokka var brukt til å registrere kva som hendte ila. natta og den vekka meg med vibrasjonsalarm. For min del er eg meir komfortabel med å ha ein slik på armen, enn å ha telefonen liggande i senga. Så det var jo veldig greit. Einaste i forhold til dette er at det er greit å skru av varsel og "alltid-på-skjerm" når ein søv, noko eg gløymte i natt, som førte til at eg vart vekka at eit varsel i halv 5 tida.

Når det gjeld batteritid ser det ut til at den held omlag 1.5 dag. Men slik eg har gjort det, legg eg den på lading ei lita stund på kvelden (medan eg les) før eg tek den på att når eg søv. Med det lademønsteret er det framleis litt batteri att når neste kveld kjem, og eg får nytta meg av eigenskapane den har både om dagen og natta.

I forhold til at dette er eit fyrstegenerasjonsprodukt har eg ein særs positiv følelse. Det fungerer saumlaust, og eg kan ikkje sei at eg har hatt noko problem med den (bortsett frå at eg dei fyrste dagane ikkje fekk den til å styre musikk, men dette var årsaka av appen som skulle styre headsetet mitt).
Det er nok i fyrsteomgang eit produkt for spesielt interesserte, men eg ser ei lys framtid for smartklokker og liknande produkt.

YouTube på PlayStation 3

Bilete henta frå PlayStation Blog EU

I USA har dei i lengre tid hatt tilgong til YouTube gjennom ein eigen dedikert app, medan me her i europa har måtta ta til takke med fantastisk dårlege YouTube XXL via nettlesaren (ein spesialutforma YouTube-klient for PS3 med dårleg søk og dårleg oppløysing). For nokre veker sidan gjekk SCEE (Sony Computer Entertainment Europe) ut med pressemelding om at dedikert YouTube-app skulle kome til europeiske PS3ar, men, dette gjaldt sjølvsagt ikkje Noreg. Men til mi store overrasking tok det ikkje lange tida før den kom.

Etter å ha lasta den ned i førigårs har den vorte flittig brukt i heimen.
Fyrsteinntrykket er veldig bra! Det ser flott ut, oppløysinga på videoane er bra og det same gjeld utforminga. Etter å ha godkjent tilgong til YouTube-kontoen din er det svært lett å få tilgong til abonnementa dine, både som enkelt kanalar og i ei samla side over det siste som er lagt ut av dei du føl.
Det er og ei fane for forslag til kva du kan sjå, dette fungerer på same måten som på nett, og vert heller lite brukt av meg personleg.

Menyen (bilete henta frå pcmag.com)

Søkefunksjonen er noko tungvint. Det fungerer omlag på same måten som det nye søket i PlayStation Store og Netflix-appen, altså at du vel ein og ein bokstav i staden for å skive. Eit pluss i YouTube er at du kan bruka smarttelefon eller tablet til å søka med, dersom du registrerer den. Dette fungerer greit, men eg hadde likt om det gjekk an å bruka YouTube-appen på telefonen/tableten i staden for å måtte gå via nettlesar.

Ein ting som  manglar er spelelister, og det er eit litt sårt savn. Dersom du føl ein serie med videoar (slik som til dømes ein "Let's play" av PewDiePie) må du finne neste video på eigahand.
Det den dog gjer er å spela av førre video i rekkja frå kanalen du ser på. Kvifor den går bakover veit eg ikkje, men dette er sikkert noko som er mogeleg å endra på.
Det er uansett veldig lett å finne ny video medan ein annan video vert spelt av, då du får tilgong til ein gjennomsiktig versjon av menyen ved å trykke ned-knappen.

Alt i alt er eg svært nøgd, og med YouTube på TVen har eg personleg sett svært mange fleire videoar no enn eg plar gjere. Dersom ein etterkvart og får tilgong til spelelister, og styring via telefon/tablet  vert enklare så er denne appen ein klar vinnar, det er den forsåvidt allereie, men ein vinnar kan og verte betre.

MrS